【台語sa攏有】順勢生產—阿母kap baby 值得koh-khah好ê對待
活動進行ê方式、kám ē 照常舉辦
ē配合政府防疫措施隨時調整 tsiah-koh 公告。
報名網址
https://lkkpomia.tgb.org.tw/posts/172
費用：免費參加，請先報名，實名制。
主講人：陳鈺萍（協和婦女病院婦產科主治醫師、好孕工作室負責人）
大綱：
a. 順勢生產是啥？
b. 阿母kap baby tī有身、生產時ê「原廠設定」
c. 生產本底應該無傷？生產創傷可能發生ê原因
d. 生產關係三代健康，beh按怎準備一場生產party？
▎活動時間 2022/5/11(拜三) 19:30 ~ 21:00
▎名額：網路報名15人，電話報名1人，現場候補1人。
防疫期間，實名制，限人數。入場前度體溫，無掛喙罨--ê，bē-tàng入場。
▎地點：李江却台語文教基金會 (台北市萬華區中華路一段106號9樓)
倚近「西門」捷運站6號出口，佳佳唱片行隔壁棟，坐「功夫茶」隔壁ê流籠上樓。
主辦單位：李江却台語文教基金會
協辦單位：台北延平扶輪社、台北市大稻埕扶輪社、台北市大龍峒扶輪社、台北市保安扶輪社、台北市稻香扶輪社、台北石橋扶輪社、台北藝埕扶輪社、台北天熙扶輪社
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486
戶名：財團法人李江却台語文教基金會
電匯：123-20-050514-2 華南銀行士林分行活儲
戶名：財團法人李江却台語文教基金會
線上捐款(定期定額)
https://donate.newebpay.com/Period/akhioh/lkk
線上捐款(單筆)
https://donate.newebpay.com/akhioh/lkk
#台語sa攏有 #陳鈺萍 #協和婦女病院婦產科 #好孕工作室 #李江却台語文教基金會 #台北延平扶輪社 #台北市大稻埕扶輪社 #台北市大龍峒扶輪社 #台北市保安扶輪社 #台北市稻香扶輪社 #台北石橋扶輪社 #台北藝埕扶輪社 #台北天熙扶輪社 #COVID19 #防疫
-----------------講座摘要-----------------
順勢生產 ——阿母kap baby值得koh-khah好ê對待
主講／陳鈺萍
記錄／白鎔維
本文是2022/5/11 ê講座摘要記錄，主講者陳鈺萍是協和婦女病院婦產科主治醫師、好孕工作室負責人。
陳鈺萍醫師一直真拍拚leh tshui-sak「順勢生產」ê概念，伊講tī有身到生產ê過程內底，lán ài重koh思考女性ê身體ài按怎hōo人對待。以早查某人生產是產婆ē到厝內來接生，tsit款傳統ê產婆是師傅牽師仔，到日本時代tsiah出現tī產婆學校受訓練ê「新式產婆」。醫學現代化發展了後，逐家慢慢lóng改去病院生囡仔；自1972年開始，政府無koh發助產師ê執照，台灣ê產婆就愈來愈少。
陳醫師講除了查某人生產ê所在自厝內變去病院，婦女ê生產姿勢mā自徛--leh變做倒--leh。倒--leh ê姿勢，是為著beh hōo醫生接生ê時tsūn ē-tàng優雅、sù-sī；產台是男性設計--ê，m̄是為著女性ê方便、sù-sī。而且西醫接生ê時慣勢做「會陰切開術」，án-ne ē-tàng hōo囡仔khah緊生--出-來；1980年代開始有研究講，會陰若切--開顛倒ē嚴重受傷，m̄是必要--ê。
陳醫師為著beh tshui-sak順勢生產，伊去Denmark（『丹麥』）看人按怎接生。Tī Denmark，是助產師kap醫生專業合作，而且in ê產房是真正為著婦jîn人leh考慮。譬如講著產房內底有美麗風景ê投影，幫助beh生產ê女性放輕鬆。陳醫師kā tsia-ê做法帶tńg來台灣，tī伊ê診所實踐，kā診所裝潢kah像咖啡館，hōo女性ê生產環境ē-tàng koh-khah溫暖、輕鬆。Tsit幾年，陳醫師ê婦產科診所mā有kap中醫合作，中醫m̄-nā tsiânn gâu做月內，mā ē-tàng kā有身ê婦女顧身體，kā in身體ê結構顧hōo好，以後khah bē有併發症。
Tī順勢生產ê過程當中，幼嬰仔是自然產程ê啟動者。幼嬰仔ē放出一寡訊息，kā媽媽ê身體講「我準備beh出--來--ah」，媽媽ê子宮就ē開始收縮。陳醫師主張ê生產方式是避免用藥仔ê「生理性生產」，tī生產ê過程，產婦ē因為身體分泌hoo-lú-bóng，經歷幾个階段ê心理狀態改變，uì一个小姐變做是一个媽媽。順勢生產beh做--ê就是排除藥仔ê干擾，hōo女性ē-tàng自然tsiânn做媽媽。
真濟媽媽tī生產了後留下一寡創傷，因為tī現代ê醫學當中，生產tiānn-tiānn hōo人當做是受苦。自有身開始，醫療、社會甚至是家庭，lóng真罕得為女性leh想，造成真濟媽媽生產了後有鬱症。陳醫師希望生產應該ài是一場party，所以m̄-nā有醫生、助產師，koh有心理師、芳療師來tàu-sann-kāng，hōo產婦ê翁婿、厝內人、朋友mā ē-tàng入來陪伴。陳醫師講伊tsit幾年發現若幼嬰仔ê哥哥、姊姊做伙來迎接伊出世，以後khah bē食醋。
幼嬰仔出世上重要--ê是kap媽媽ê頭擺接觸。一般ê過程是嬰仔生--出-來就抱去洗，m̄-koh順勢生產ê概念主張幼嬰仔出世ài先踮tī媽媽ê胸坎，因為tsit个環境kap媽媽腹肚內底khah成，hōo媽媽kap幼嬰仔lóng ē-tàng khah有安全感，幼嬰仔beh適應新環境mā ē-tàng khah順利。陳醫師講，生產m̄是leh受苦，是一个成長、學習ê過程，不管是產婦iah是產婦ê厝內人lóng ài學習按怎好好仔面對tsit个過程。 
#台語sa攏有講座 專欄，本文使用教育部推薦漢字kap臺灣閩南語羅馬字拼音方案。
#台文通訊BONG報 339期，2022年6月出刊。
歡迎捐款贊助 #李江却台語文教基金會
（捐款可抵稅，匯款後請通知02-23112199）