#22 我的閩南語教學
阮是一个在額的國校仔老師，嘛通過閩南語中高級認證，非常愛臺語；對教臺語充滿熱情。知影臺語的流失非常的緊，更加了解家己的責任重大。
我的臺語教學已經二十偌冬矣！拍拚推捒臺語，逐工早起自修的時間，放送閩南語教學CD；每禮拜二食中晝的時間，就放閩南語電子冊，予囡仔兄、囡仔姐攏浸佇臺語的世界，因為阮知影上好的語言教法就是「浸水式」，閣加上「捷講喙會順，捷做手袂鈍」的做法。
因此逐工宿題攏會出臺語的功課，紲落來正式臺語課的時，予小朋友認捌閣較濟臺語的媠，予in對臺語閣較有興趣。每一个學期欲結束進前，會共規本的閩南語課本設計成一个成果發表會，予小朋友做主角。予小朋友對臺語有足大的成就感佮自信，課程安排佮生活情境結合。
甚至有民視電視台、大愛電視台、地方電視台來採訪佮紀錄小朋友臺語能力的成長。所做的一切，攏向望共臺語的根深深留佇小朋友的身上。按呢阮的臺語教學才有價值啦！